Մամուլի հաղորդագրություն/Տավուշի մարզում վիքիակումբներ են բացվել
Տավուշի մարզում 7 նոր Վիքիակումբ է բացվել
«Վիքիմեդիա Հայաստան» գիտակրթական հասարակական կազմակերպություն
Կոնտակտային անձ՝
Սուսաննա Մկրտչյան,
«Վիքիմեդիա Հայաստան» ԳՀԿ նախագահ
+37493118800
info
wikimedia.am
Հուշագրի համաձայն՝ Վիքիմեդիա Հայաստանը պարտավորվում է Տավուշի մարզի ուսուցիչների համար Վիքիպեդիայի դասընթացներ կազմակերպել և օգնել նրանց վիքիակումբների ստեղծման և գործունեության մեջ։ Մարզպետարանը պարտավորվում է ուսուցիչներին խրախուսական հավելավճարներ հատկացնել ըստ իրենց գործունեության մոնիթորինգի։
Գործընթացը սկիզբ է առել մարտի 25-ին, երբ Տավուշի մարզի 35 ուսուցիչ մասնակցեց Վիքիմեդիա Հայաստանի կազմակերպած Վիքիպեդիայի խմբագրման հնգօրյա դասընթացին։
Համագործության երկրորդ փուլը մեկնարկեց հուլիսի 6-ին, երբ Վիքիակումբներ հիմնադրվեցին Գոշ, Լուսահովիտ և Սարիգյուղ համայնքներում, իսկ հուլիսի 13-ին՝ Կիրանցի, Նոյեմբերյանի երկու՝ ավագ և հիմնական, Արճիսի դպրոցներում։
Դպրոցներն ընտրվել են ըստ Վիքիպեդիայում ուսուցիչների ներդրումների։ Դպրոցում Վիքիակումբ հիմնադրելու համար անհրաժեշտ է, որ դպրոցի ուսուցիչներից գոնե մեկը տիրապետի Վիքիպեդիայում խմբագրման գործիքներին և շարունակաբար որակյալ ներդրում ունենա։
«Վիքիակումբները կրթական հեղաշրջում կատարելու պոտենցիալ ունեն։ Շատ բնակավայրերում վիքիակումբները աստիճանաբար փոխում են թե՛ աշակերտների և թե՛ չափահասների մտածելակերպը»,— նշում է Վիքիմեդիա Հայաստանի նախագահ Սուսաննա Մկրտչյանը և հավելում, որ շատ բան կախված է ակումբի ուսուցիչ-համակարգողից։ Սուսաննա Մկրտչյանն ընդգծում է, որ շատ կարևոր է, որ ակումբի համակարգողը շարունակական ներդրում ունենա Վիքիպեդիայում, ինչը հնարավորություն կտա նրան ընդլայնել և խորացնել իր մասնագիտական գիտելիքները, դասավանդման նորարարական մոտեցումներ ձեռք բերել և յուրաքանչյուր աշակերտին տարբերակված մոտեցում ցուցաբերել։
Պատկերասրահ
-
Լուսահովիտի վիքիակումբի բացում -
Գոշի վիքիակումբի բացում -
Նոյեմբերյանի ավագ դպրոցի վիքիակումբի բացում -
Կիրանցի վիքիակումբի բացում -
Սարիգյուղի վիքիակումբի բացում -
Արճիսի վիքիակումբի բացում -
Նոյեմբերյանի հիմնական դպրոցի վիքիակումբի բացում
Վիքիպեդիայի խմբագրմանը դպրոցականներին մասնակից դարձնելու նպատակով Վիքիմեդիա Հայաստանը Հայաստանի տարբեր բնակավայրերում ստեղծում է վիքիակումբներ, որտեղ նրանք ազատ ժամերին, համակարգողի օգնությամբ սովորում և խմբագրում են հայերեն հոդվածներ:
Ակումբը ոչ ֆորմալ կրթության օղակ է, ունի համակարգող, որն այցելուներին սովորեցնում է խմբագրման նրբությունները, տեղեկացնում նոր գործիքների մասին, հետևում խմբագիրների ստեղծած հոդվածներին։ Այցելուները հիմնականում դպրոցականներ ու երիտասարդներ են, սակայն կազմակերպությունն ակումբների միջոցով կրթում է նաև մեծահասակների։
Վիքիմեդիա Հայաստանը հիմնադրվել է 2013 թվականի մայիսին 14-ին՝ որպես Վիքիմեդիա տեղական կազմակերպություն։ «Վիքիմեդիա Հայաստան» գիտակրթական հասարակական կազմակերպության նպատակն է խթանել վիքի նախագծերի տարածումը և զարգացումը Հայաստանում, հանրայնացնել ազատ գիտելիքի գաղափարը և աջակցել նոր վիքիմեդիացիներին։