Մամուլի հաղորդագրություն/ԳԼԱՄ ֆորում Երևանում
ԳԼԱՄ ֆորում Երևանում
«Վիքիմեդիա Հայաստան» գիտակրթական հասարակական կազմակերպություն
Կոնտակտային անձ
Խաժակ Դրամփյան
Հեռ․՝ 098 135797
«Վիքիմեդիա Հայաստան» գիտակրթական հասարակական կազմակերպությունը «Վիքին սիրում է Երևանը» նախագծի շրջանակներում 2018 թվականի մայիսի 10-12-ը Երևանում կազմակերպում է միջազգային ԳԼԱՄ ֆորում (GLAM - Galleries, Libraries, Archives, Museums - պատկերասրահներ, գրադարաններ, արխիվներ, թանգարաններ)։ «Վիքին սիրում է Երևանը» նախագիծն իրականացվում է Երևանի 2800-ամյակի միջոցառումների շրջանակում և նպատակ ունի Հայաստանի մշակութային կազմակերպությունների օժանդակությամբ Վիքիմեդիա Հիմնադրամի առցանց նախագծերում հարստացնել Երևանի մասին տեղեկատվությունը։
Եռօրյա ֆորումին Վիքիմեդիա Հիմնադրամից հրավիրված Վիքիտվյալների և տարբեր երկրներում հաջողությամբ ԳԼԱՄ նախագծեր իրականացնող մասնագետները հայաստանցի գործընկերներին կներկայացնեն մշակութային կառույցների հետ համագործակցության իրենց փորձը: Ֆորումի ընթացքում մասնակիցները կծանոթանան խմբագրման գործիքներին, որոնց միջոցով Երևանը, երևանյան ԳԼԱՄ կառույցները պատշաճ կներկայացվեն Վիքիտվյալներում, Վիքիպահեստում և Վիքիպեդիայում։ Հյուրերը կսովորեցնեն Վիքիտվյալների գործիքաշարը, որի օգնությամբ Երևանին վերաբերող և մշակութային կազմակերպությունների ունեցած հարուստ նյութը մատչելի կդառնա և ժամանակին ավտոմատ կթարմացվի բազմաթիվ լեզուներով՝ արդյունքում մեծացնելով այդ կառույցների հանդեպ հանրության հետաքրքրությունը: Կներկայացվի նաև ԳԼԱՄ ծրագրի հայաստանյան փորձը: Ֆորումի երրորդ օրը օտարերկրյա հյուրերը կայցելեն երևանյան թանգարաններ՝ տեղում ծանոթանալու առկա նյութերին և քննարկելու Վիքիմեդիա նախագծերում դրանք ներկայացնելու հնարավորությունը։
Հրավիրում ենք Ձեզ մայիսի 10-ին ժամը 10։00-ին Վիքիմեդիա Հայաստանի գրասենյակ (հասցե՝ Երևան, Արշակունյաց 4, Մամուլի շենք, 4-րդ հարկ) մասնակցելու միջոցառմանը և լուսաբանելու այն։
Ստորև կարող եք ծանոթանալ միջոցառման օրակարգին:
Համագործակցության ակնկալիքով,
Վիքիմեդիա Հայաստան
Վիքիմեդիա Հայաստանը հիմնադրվել է 2013 թվականի մայիսին 14-ին՝ որպես Վիքիմեդիա տեղական կազմակերպություն։ «Վիքիմեդիա Հայաստան» գիտակրթական հասարակական կազմակերպության նպատակն է խթանել վիքի նախագծերի տարածումը և զարգացումը Հայաստանում, հանրայնացնել ազատ գիտելիքի գաղափարը և աջակցել նոր վիքիմեդիացիներին։