Հաշվետվություն/2026-08
Վիքիակումբներ
Գործունեություն ծավալող 11 վիքիակումբներում (Ախուրյանի, Արթիկի, Գյումրու, Դդմաշենի, Իջևանի, Լեռնապատի, Կիրանցի, Կողբի, Հացիկի, Տաշիրի, Քաջարանի) 2026 թվականի օգոստոսի 31-ի դրությամբ գրանցված էր 167 անդամ։
Ակումբականները մասնակցել են «Իսպանական վիքիարշավ» մրցութային խմբագրաթոնին, որի ընթացքում նախապես կազմված ցանկերից կամ ինքնուրույն այլ լեզուներից թարգմանել են Իսպանիային առնչվող հոդվածներ։ Խմբագրաթոնին մասնակցել են նաև ակումբների անդամ չհանդիսացող խմբագիրներ։ Վիքիակումբների անդամների շրջանում լավագույն արդյունքն արձանագրած մասնակիցն արժանացել է «Վիքիմեդիա Հայաստանի» արժեքավոր նվերին և հավաստագրի, ևս 4 մասնակցի տրվել են հավաստագրեր։
Ընդամենը օգոստոսի ընթացքում վիքիակումբների 167 անդամից Վիքիպեդիայում խմբագրել է 50-ը։ Ընդհանուր առմամբ նրանք ստեղծել են 345 հոդված և կատարել 1004 խմբագրում։ Ներդրումներն ըստ ծավալի՝ 7․577․048 բայթ։
Օգոստոսին ակումբականներից 46-ը ներդրում են կատարել Վիքիտվյալներ նախագծում։ Ընդհանուր առմամբ նրանք արել են 337 խմբագրում։
Իսպանական վիքիարշավ
Օգոստոսին հատուկ «Վիքիմեդիա Հայաստանի» վիքիակումբների համար կազմակերպվել էր «Իսպանական վիքիարշավ» մրցութային նախագիծը, որի ընթացքում այլ լեզուներով Վիքիպեդիաներից թարգմանելով ստեղծվեցին Իսպանիային նվիրված հոդվածներ։ Դրանք կարող էին լինել ցանկացած թեմայով՝ ըստ մասնակցի նախընտրության։ Միակ պայմանն այն էր, որ հոդվածի առարկան պետք է այս կամ այն կերպ առնչվեր եվրոպական այդ պետությանը։ Կարող էին գրվել ինչպես կենսագրություններ, այնպես էլ հոդվածներ տարբեր թեմաներով՝ աշխարհագրություն, սպորտ, խոհարարություն, մշակույթ, արվեստ, գրականություն և այլն։ Օգնության համար տրվել էին հոդվածների ցանկեր, որոնցից կարելի էր ընտրել հոդվածներ և թարգմանել, սակայն թույլատրվում էր գրել նաև ցանկերից դուրս հոդվածներ՝ պահպանելով իսպանական թեմատիկան։
Համաձայն նախագծի կանոնների՝ դրան կարող էին մասնակցել նաև այլ խմբագիրներ, որոնք, սակայն, Վիքիակումբների մրցույթին չէին մասնակցում։
Նախագծին մասնացել և հոդվածներ է ստեղծել 50 վիքիխմբագիր։ Մեկ ամսվա ընթացքում նրանք ստեղծել են 8․393․530 բայթ ծավալով 450 հոդված։
Մրցույթի հաղթող վիքիակումբականն արժանացել է «Վիքիմեդիա Հայաստանի» սահմանած նվերին և հավաստագրին, լավագույն արդյունք ցուցաբերած ևս չորս ակումբական ստացել են հավաստագրեր։
Երիտասարդական ամառային Վիքիճամբար 2026
2026 թվականի օգոստոսի 9-16-ին Ծաղկաձորում տեղի ունեցավ Երիտասարդական ամառային Վիքիճամբար 2026-ը, որն այս անգամ ուներ միջազգայինի կարգավիճակ․ 48 մասնակիցների թվում էին իտալացի 3 և սլովենացի 1 վիքիխմբագիրներ։ Նրանք հոդվածներ էին գրում և բարելավում իրենց մայրենի լեզուներով Վիքիպեդիաներում։ Հայաստանցի 44 ճամբարականներից 25-ը նորեկներ էին։ Մասնակիցները բաժանված էին 12-հոգանոց 4 ջոկատների, որոնք մրցում էին ինչպես Վիքիպեդիայում հոդվածներ գրելու, այնպես էլ սպորտային, ինտելեկտուալ և մշակութային մրցույթներում։ Ընդամենը վիքիճամբարի ընթացքում կարևորագույն հոդվածների ցանկից Հայերեն Վիքիպեդիայում գրվեց 24․574․800 բայթի 469 հոդված։ Եթե այս թվերին գումարենք նաև ճամբարից առաջ խմբագրել չիմացողների համար կազմակերպված դասընթացի ժամանակ գրված հոդվածները, ապա ընդհանուր առմամբ գրվեց 35․866․435 բայթի 611 հոդված։
Ճամբարի մասնակիցների համար կազմակերպվեցին հետևյալ խաղ-մրցույթները․ «Քաղցած խաղեր», վոլեյբոլ, «Ֆորտ Վիքի» (ժայռամագլցման տարրերով և լողի մրցումով), բեմադրության ներկայացում, «Լավագույն շինարար», «Լավագույն խոհարար» մրցույթ, «Բրեյն ռինգ» ինտելեկտուալ խաղ, սեղանի թենիս և բադմինթոն, ժամանցային խաղ, որը բաղկացած էր տարբեր զվարճալի կարճ խաղերից, ինչպես նաև մասնակիցների համար կազմակերպվեց երգի դաս, որի ընթացքում պրոֆեսիոնալ երգչուհին սովորեցրեց իտալական և հայկական ժողովրդական երգեր։
Բացի մրցույթներից, մասնակիցներն այցելեցին «Altitude 1900» դայվինգի կենտրոն, որտեղ միջազգային կարգի մասնագետը ճամբարականներին ներկայացրեց ֆրի դայվինգի և սկուբա դայվինգի տարբերություններն ու առանձնահատկությունները, անհրաժեշտ հանդերձանքի նշանակությունը։ Դրանից հետո մասնակիցները ստացան Սևանա լճում առաջին անգամ ջրի տակ շնչելու հնարավորություն։
Ճամբարականների համար կազմակերպվեց նաև «Գաղտնի ընկեր» խաղը։
Ճամբարի նախավերջին օրը՝ ուշ երեկոյան, մասնակիցներն ու կազմակերպչական թիմը խորովեցին նրբերշիկներ ու կարտոֆիլ, խարույկի շուրջը մասնակիցները նվագեցին կիթառ ու երգեցին տարբեր երգեր։ Վերջին օրը կայացավ հաղթող ջոկատներին ու խմբագիրներին հայտարարելու և պարգևատրելու, ինչպես նաև պաշտոնական փակման արարողությունը։
Վիքիփորձի փոխանակման ծրագիր
Այս տարի գարնանը Կենտրոնական և Արևելյան Եվրոպայի հանգույցը նախաձեռնեց «Վիքիփորձի փոխանակման» ծրագիրը, որի նպատակն էր փորձի փոխանակման հնարավորություն ստեղծել զարգացման ավելի ցածր մակարդակ ունեցող վիքիհամայնքների երիտասարդ ներկայացուցիչներին համար։ Այն նախատեսված էր կազմակերպել մենթոր (զարգացած վիքիհամայնք)-փորձնակ (զարգացող վիքիհամայնք) ձևաչափով։ Ի սկզբանե «Վիքիմեդիա Հայաստանը» փորձնակ հյուրընկալելու հետաքրքրություն էր հայտնել։
Ընտրության արդյունքում «Վիքիմեդիա Հայաստանը» պետք է հյուրընկալեր «Սլովենիայի վիքիպեդիացիների խմբի» երիտասարդ ներկայացուցիչ Նալ Մենսինին։ Մենթոր-փորձնակ հանդիպումների ընթացքում պարզ դարձավ, որ Ամառային երիտասարդական Վիքիճամբարին Նալի մասնակցությունը հնարավորություն կտա վերջինիս ծանոթանալու կազմակերպության աշխատանքին, նորեկների ներգրավման սկզբունքներին, միջոցառումների նախապատրաստական գործընթացներին և հաղորդակցության միջոցներին։
Այսպիսով, Ամառային երիտասարդական Վիքիճամբարի չորրորդ օրը մասնակիցներին միացավ նաև Նալը։ Փոխանակման ծրագիրը նախագծված էր այնպես, որ առաջին օրերին Նալը մասնակցի ճամբարի առօրյային, ծանոթանա հայ մասնակիցների հետ, շփվի կազմակերպչական թիմի հետ և ընկալի Վիքիճամբարը որպես մասնակից։
Արդեն փոխանակման ծրագրի երրորդ օրվա ընթացքում «Վիքիմեդիա Հայաստանի» աշխատակազմի տարբեր անդամներ կիսվեցին իրենց փորձով՝ ներկայացնելով միջոցառումների կազմակերպման նախապատրաստական աշխատանքները, տարբեր տարիքային խմբերին թիրախավորելու մեթոդները, ճամբարի կազմակերպման նրբությունները, անվտանգության և ներառականության ուղղությամբ կատարվող աշխատանքը և այլն։ Այդ օրվա ընթացքում Նալը կրկին հնարավորություն ունեցավ ակտիվորեն մասնակցելու ճամբարի առօրյային և խմբագրման աշխատանքներին։
Փոխանակման ծրագրի չորրորդ օրվա ընթացքում Նալին ներկայացվեցին հաղորդակցության հիմնական մեթոդները, տարբեր տարիքային խմբերին թիրախավորելու սկզբունքները, միջոցառումներից առաջ և հետո սոցիալական մեդիայի միջոցով տարվող աշխատանքը, հաղորդակցության ռազմավարությունը։
Քննարկվեցին նաև երկու համայնքների հնարավոր համագործակցության տարբերակները, և որոշվեց, որ նոյեմբեր ամսին կազմակերպվելու է հայ-սլովենական վիքի խմբագրաթոն, որի ընթացքում հայ և սլովենացի մասնակիցները հոդվածներ են ստեղծելու համապատասխանաբար Սլովենիայի և Հայաստանի մշակույթի, սպորտի, անձանց և պատմության մասին հոդվածներ։
Համայնքային հանդիպում
2026 թվականի օգոստոսի 5-ին «Վիքիմեդիա Հայաստանի» գրասենյակում տեղի է ունեցել նախապես ծրագրված հանդիպում-քննարկում Կազմակերպության անդամների, աշխատակիցների և վիքիհամայնքի հետաքրքրված անդամների հետ։ Հանդիպումը կազմակերպվել էր առկա ձևաչափով, տրամադրվել էր նաև առցանց ZOOM հարթակ։
Հավաքին գրասենյակում մասնակցեց վիքիհամայնքի 8 անդամ, ևս 6՝ առցանց։
Հանդիպման մասնակիցներին ներկացվեցին անցած եռամսյակում «Վիքիմեդիա Հայաստանի» իրագործած նախագծերը, մրցույթները, միջոցառումները։ Խոսվեց Հայաստանի Վիքիմեդիա համայնքի անդամների միջազգային միջոցառումներին մասնակցության մասին։
Ներկայացվեցին սպասվող նախագծերի հնարավոր ժամկետները։
Մամուլում
Այս ամիս Վիքիմեդիա Diff բլոգում «Վիքիմեդիա Հայաստանը» հրապարակել է մեկ հոդված, որը վերաբերում է Ամառային երիտասարդական Վիքիճամբարի շրջանակում սլովենացի Նալ Մենսինի մասնակցությանը և փորձի փոխանակման ծրագրին։ Վերջինս կազմակերպվել էր Կենտրոնական և Արևելյան Եվրոպայի հանգույցի նախաձեռնությամբ՝ «Վիքիփորձի փոխանակման» ծրագրի շրջանակում։